ज्ञानप्रभेला विद्वानांशी जोडत गेली पुस्तके
अज्ञानाच्या अंधाराला कापत गेली पुस्तके

नैराश्याने भरकटलेल्या बालमनांच्या अंतरी
आशादायी यशोमालिका गुंफत गेली पुस्तके

वैफल्याच्या दुष्काळाने विस्कटलेल्या मस्तकी
साफल्याचे शब्दबियाणे पेरत गेली पुस्तके

शास्त्रज्ञांच्या संकल्पांना देत यशस्वी भरारी
आभाळाची रंगसंगती सांगत गेली पुस्तके

लेखनीतल्या शब्दफुलांना पोटात सदा घेतले
वात्सल्याने जीव तयांना लावत गेली पुस्तके

वाचनालयी विभिन्न धर्मी भव्य पुस्तकी भावकी
एकात्मतेची सार्थ शृंखला माळत गेली पुस्तके

ग्रंथ आपले खरे सोबती ‘देवदत्त’ या जीवनी
कर्तृत्वाने सदासर्वदा जिंकत गेली पुस्तके

देवदत्त बोरसे